உங்கள் கருத்து
தமிழில் எழுத
பிரிவுகள்
வாசகர்கள்


முந்தைய செய்திகள்

உலகில் தோன்றும் ஒவ்வொரு உயிரும் ஒரு நாள் மரித்துப்போகும் ஆனால் பூமியில் வாழும் ஒட்டுமொத்த உயிரும் ஒரே நாளில் மரித்துப்போனால்? எண்ணிப்பார்க்கவே எம்முள் அச்சம் குடிகொள்வதை தவிர்க்கமுடியவில்லை. ஆனால் 2012 ஆம் ஆண்டு டிசம்பர் 21ஆம் நாள் இது நடந்தே தீரும் என்கிறது ஒரு கூட்டம்.

சுமார் 65 மில்லியன் ஆண்டுகளுக்கு முன்னர் வரையில் பூமியில் கோலோச்சி இருந்த டைனோசோர்கள் அழிந்தது போல ஆர்ப்பரித்துக்கொண்டிருக்கும் மனித இனமும் வருகின்ற டிசம்பரில் ஏற்படப்போகும் நிபிறு பிரளயத்தினால் அழியப்போகிறது.

பூமியில் பாரிய எரி கல் ஒன்று மோதுண்டதனால் வெளியான வெப்பம், தூசு என்பவற்றுடன் இக்கல் விழுந்தமையினால் ஏற்பட்ட பூமி அதிர்வு, கடல் பரப்பிலிருந்து வெளியான நீர் என்பவற்றாலேயே டைனோசர்கள் பூமியில் சுவடுகளாக மாறியதற்கு காரணம். மேலும் மெக்சிகோ பகுதியில் ஏற்பட்ட இச்சம்பவத்தின் போது வெளியான தூசு பூமியிலிருந்து முழுமையாக நீங்குவதற்கு சில ஆண்டுகள் எடுத்தது.


இதனால் அண்ணளவாக பூமியின் முழுப்பகுதியுமே பாதிக்கப்பட்டதுடன் பல்லாயிரக்கணக்கான இனங்கள் அழிவடைந்ததாம். இதிலிருந்து எஞ்சிய உயிரினங்களிலிருந்தே கூர்ப்பு மூலம் மனிதன் 2.5 மில்லியன் ஆண்டுகளுக்கு முன்னர் உருவாக ஆரம்பித்து தற்கால மனிதனாக தோற்றம் பெற்று சுமார் 13 ஆயிரம் வருடங்கள் என்கிறது விஞ்ஞானம்.
இவ்வாறு பூமிக்கு வந்த மனித இனம், இந்த டிசம்பர் மாதம் 21ஆம் திகதி ஏற்படப்போகும் நிபிறு பிரளயத்தினால் இப் பூமியை விட்டுச் செல்லப் போவதை யாராலும் தடுக்க முடியாது. இதனை நாசாவும் நன்கு அறிந்து வைத்துள்ளது. இவ்வாறெல்லாம் பல தகவல்களை கசியவிட்டு மக்களை பீதியில் தள்ளிவிட்டுள்ளார்கள் இனம் தெரியாதவர்கள் சிலர்.

உண்மையில் நிபிறு பிரளயம் என்றால்? இது நிச்சயம் டிசம்பரில் ஏற்படுமா? என்றவாறான பல கேள்விகளுக்கும் இதுவரையில் நம்பும் விதமாக வெளியாகியுள்ள தகவல்கள் இவ்வாறு அமைந்துள்ளது.

சூரியத்தொகுதியை போலவுள்ள பல்லாயிரக்கணக்கான தொகுதியில் ஒரு தொகுதியிலிருந்து நிபிறு எனும் கோள் 3600 வருடங்களுக்கொரு முறை பூமியை அண்மிக்கும் இதன் போது நிபிறுவின் துணைக்கோள்களுடன் சேர்த்து மொத்தமாக 6 கோள்கள் பூமியை பாதிப்புக்குள்ளாக்கும்.

இதனால் பாரிய விளைவுகளை ஏற்படுத்தும் சுனாமி, பூமியதிர்ச்சி, எரிமலை வெடிப்புக்கள் மற்றும் நிலங்கள் பல துண்டுகளாக பிளவடையும் இதனைத் தொடர்ந்து சுமார் 2 வருடங்களில் படிப்படியாக மிக மெதுவான முறையில் பூமி தன்னை மீளமைக்கும். இதற்கிடையில் பூமியிலுள்ள மனிதர்களில் 2ஃ3 பங்கினருக்கு மேல் அழிந்துவிடுவார்கள். இதுவே ‘நிபிறு பிரளயம்’ எனச் மிகச் சுருக்கமாக விளக்கியுள்ளார்கள்.

இம்முறை நிபிறு பிரளயம் ஏற்படப்போகும் சந்தர்ப்பத்தில் பூமியானது தன்னை தானே ஒழுங்குபடுத்த ஆரம்பிக்கும் காலமாக இருப்பதோடு துருவங்களும் இடமாற்றடையும். இந்நிலையில் 3 நாட்களுக்கு சூரியன் தனது சுழற்சியை நிறுத்தி வைத்திருக்கும். மேலும் 180 பாகையில் மாறி மாறி திரும்பலடையும் ஆனால் சுழற்சி இருக்கமாட்டாது என்கிறார்கள்.

இதற்காக பல நம்பிக்கைக்குரிய ஆதரங்களையும் முன்வைத்துள்ளனர். அவை அனைத்தும் 2012ஆம் ஆண்டினையே சுட்டிக்காட்டுகின்றது. எழுத்தாளரும், வானியல் ஆலோகசருமான 1500ஆம் ஆண்டுகளில் வாழ்ந்த நெஸ்ட்ரடோமஸ் அனுமானித்துள்ளதாவது, எமது கிரகம் பெரியதோர் இலக்கில் செல்லுகிறது அது 2012 முடிவடையும். ஆனால் அது எமக்கு கிடைக்கமாட்டாது.

மேலும் 20ஆம் நூற்றாண்டின் தலைசிறந்த விஞ்ஞானி ஐன்ஸ்டைன் கூறியுள்ளதாவது, துருவப் பெயர்ச்சி இடம்பெறும் போது நாம் பாரியளவில் பாதிக்கப்படுவோம். இவையெல்லாம் இந்த நிபிறு பிரளயத்தையே குறிக்கிறது எனக் கூறும் அதே வேளை மாயன் நாட்காட்டியை சுட்டிக்காட்டியுள்ளனர்.

மிகப் பழைமை வாய்ந்த நாட்காட்டிகளில் ஒன்றான மாயன் 2012.12.21 அன்றுடன் முடிவடைகின்றது. அத்துடன் விஞ்ஞானத்தின் அண்மைய கண்டுபிடிப்புக்கள் பலவற்றினை துல்லியமா பல ஆண்டுகளுக்கு முன்னரே மாயன்கள் கண்டுபிடித்துள்ளனர். இதனை கல்வெட்டுக்கள், சித்திரங்கள் என்பவற்றினூடாக விட்டுச்சென்றுள்ளனர். குறிப்பாக பூமியில் வாழ்ந்த ஒவ்வொரு உயிரினமும் அழிந்த பின்னர் புதியதோர் உயிரினம் தோன்றும், உயிரின் தொடர்ச்சியை சித்தரிக்கும் வகையிலமைந்துள்ள சித்திரங்கள் அதிசயிக்கத்தகதாகவே உள்ளது. இவ்வாறு விஞ்ஞானத்தை வென்ற மாயன்களின் கணிப்பின் படி உலகம் 2012இல் அழியும் என்பதே.

மேலும் ஹிப்ரு பைபிளும் 2012இல் உலகில் பாரிய அழிவுகள் உண்டு என்பதை உணர்த்துகின்றது. இது போல இன்னும் ஏராளமான குறிப்புக்கள் 2012ஆம் ஆண்டில் ஏற்படப்போகும் அழிவுகளை மத நம்பிக்கைகள் சார்ந்தும் சாராமலும் சுட்டிக்காட்டுவதாக தெரிவிக்கின்றார்கள்.

இவை தவிர 3600 வருடங்களுக்கு முன்னர் நிபிறு பிரளத்தினால் பாதிக்கப்பட்டு எச்சங்களாகிய மனித இனத்தினால் அடுத்துவரும் சந்ததிக்கு விட்டுசென்ற சுவடுகளும் ஏராளம் உண்டு. அவற்றில் பல்வேறு அம்சங்கள் மத நம்பிக்கைக்குரிய எழுத்துருக்களாக மாற்றம் பெற்று இன்றுவரை அழியாது பேணப்படுகிறதாம்.

மேலும் நாசாவானது இந்த நிபிறு பிரளயம் பற்றி நன்கு அறிந்துள்ளதாகவும் அதிலிருந்து மீளுவதற்காக 1983ஆம் ஆண்டிலேயே ஆயத்தமாகிவிட்டதாகவும் இதற்காக இரகசியத் திட்டங்களை மேற்கொண்டு வருவதாகவும் தெரிவிக்கின்றனர்.

இதற்காக நாசா ரகசியமாக மேற்கொண்டுள்ள திட்டத்தினை விளக்குகையில், 1982ஆம் ஆண்டு சூரியத்தொகுதியிலுள்ள 9 கோள்களை தவிர மேலதிகமாகவும் ஒரு கோளினை கண்டுபிடித்துள்ளது நாசா. நிபிறு பிரளம் ஏற்படும் போது கண்டுபிடித்துள்ள புதிய கோளிற்கு தப்பிச் செல்வது திட்டம். அதற்கான சகல ஏற்பாடுகளும் நடைபெற்ற வண்ணமே உள்ளது.

குறிப்பாக தப்பிச்செல்லதவற்குரிய கோளாக அப்புதிய கோளினை தேர்வு செய்துள்ளமைக்கான காரணம் என்னவெனில் பிரளயம் ஏற்படும் காலப்பகுதில் பூமிக்கு மிக மிக அண்மையில் இருக்கும் கோள் இதுவாம். அத்துடன் பூவியிலிருந்து இக்கோள் தூரமாக செல்லுவதற்கு 2 வருடங்களுக்கு மேலாகும். இதனால் மீளமைக்கப்பட்ட பூமிக்கு விரைவில் திரும்பிவிடலாம். இதற்காக அமெரிக்காவில் அதிகாரபூர்வமற்ற விமானம் நிலையம் ஒன்றும் நிறுவப்பட்டுள்ளதாம்.

குறித்த விமான நிலையம் அமைக்கப்பட்டுள்ள பகுதியில் உலகிலுள்ள முக்கிய பணக்காரர்கள் போட்டி போட்டுக்கொண்டு இடங்களை கொள்வன செய்து வைத்துள்ளனர். இவை பிரளயத்திற்கான முன்னேற்பாடுகள் என்று கூறும் அதேவேளை மொத்த மனித குலத்தினையும் புதிய கோளில் குடியேற்றி பாதுகாப்பது சாத்தியமற்ற விடயம் என்பதாலேயே இதுவரையில் இத்தகவல்களை வெளியிடாமல் ரகசியம் பேணுகின்றனர் என்கின்றனர்.

மேலும் இந்த கோளினை கண்டுபிடித்த அடுத்த ஆண்டே நீண்டகால பாரிதோர் இலக்கினை நோக்காக கொண்டு IRAS (Infrared astronomical satellite) இனை நிறுவியது. இத்திட்டம் முழுவதற்குமாக ‘Planet X /(நிபிறு)’ எனப்பெயரிடப்பட்டுள்ளது.

பூமியின் தென்பகுதிகளிலேயே நிபிறு பிரளயத்தின் அறிகுறிகள் முதன் முதலில் தென்படும் என்ற காரணத்தினால் இத்திட்டத்தினை முன்னெடுக்க தென்துருவத்தில் ஸ்டோன்ஹென்ஜ்ஃஈஸ்டர் ஐலேண்ட் பிரதேசத்தினை தேர்வு செய்து நிபிறு கோள்கள் சம்மந்தமாக உலகுக்கு தெரியாமல் ஆராய்ச்சிகளை மேற்கொண்டு வருகின்றனர் எனவும் தெரிவிக்கின்றனர்.

ஆனாலும் தற்போது வெளியாகியுள்ள நிபிறு பிரளயம், பூமியை இருள் சூழல், துருவ மாற்றங்கள் என்பவை 2012இல் நடைபெறமாட்டாது என்று 2008ஆம் ஆண்டு காலப்பகுதியிலிருந்து மறுத்துவந்துள்ளமை குறிப்பிடத்தக்கது.

மேலும் அடுத்த 4 மில்லியன் வருடங்களுக்கு பூமி அழிவடைய வாய்ப்பில்லை. அத்துடன் துருவமாற்றமோ பூமி தன்னைத் தனே ஒழுங்கு படுத்தும் செயற்பாடுகளோ 2012இல் இடம்பெற மாட்டாது என்றும் இது மாயன் மற்றும் சமரியரின் நம்பிக்கைகள் மட்டுமே என்றும் தெரிவித்துள்ளது.

நிலைமை இவ்வாறு இருக்கு 2012இல் பூமியில் பாரிய அழிவுகள் இடம்பெறும் என்ற கருத்து வலுக்க குறித்த நபர்களால் கூறப்பட்டுள்ள சில அறிகுறிகள் நடந்துள்ளமை அழிவு ஏற்பட்டுவிடுமோ என அச்சத்தை ஏற்படுத்துவதை மறுப்பதற்கில்லை.

2009ஆம் ஆண்டளவில் சூரியனைப் போன்றதொரு பிரகாசமான வால்வெள்ளி ஒன்று பூமியில் தோன்றும் அது வெற்றுக் கண்ணுக்குத் தென்படும் இதுவே பிரதான அறிகுறி என்று கூறியிருந்தனர். அப்படி ஒன்றும் 2009இல் இடம்பெறவில்லை என்றாலும் இந்த வருடம் ஒக்டோபர் மாதமளவில் நியூஸிலாந்து பகுதியில் கொமட் என்ற வால்வெள்ளி பகல் நேரங்களிலும் தென்பட்டுள்ளது. ஆனால் இதனால் பூமிக்கு ஆபத்தில்லை என்று விஞ்ஞானிகள் தெரிவித்திருந்தனர்.

அப்படியானால் 2012ஆம் ஆண்டில் பூமியில் ஏதாவது அசம்பாவிதங்கள் இடம்பெறுமா? என்றால், ஆபத்து வரும் என்று யார் சொன்னது, வராமல் இருந்தால் நன்றாக இருக்கும் என்றுதான் சொல்லுகிறோம் என்ற பாணியிலேயே விடையளிக்கின்றனர்.

வசந்த காலம், கோடை காலம், மாரி காலம் என மாறி மாறி வருடத்தினை அழகுபடுத்த பருவங்கள் வந்து போவதைப் போல டிசம்பர் மாதம் வதந்திகாலமாக மாறி மக்களை அச்சுறுத்தி வருவதை கடந்த சில வருடங்கள் உறுதிப்படுத்திக்கொள்ளத் தவறவில்லை.

உண்மையில் டிசம்பர் மாதம் வருடத்தின் இறுதி மாதமே அன்றி அது உலகத்தின் இறுதி மாதமல்ல என்பதை அடுத்தடுத்து வருகின்ற ஒவ்வொரு ஜனவரியும் அந்த நம்பிக்கையை மக்கள் மத்தியில் ஏற்படுத்திக்கொண்டுதான் இருக்கின்றது.


யானை வரும் பின்னே மணி ஓசை வரும் முன்னே எனும் பாணியில் டிசம்பர் மாதம் ஆரம்பமாவதுதான் தாமதம் வதந்திகள் முந்திங்கொள்ளும். அதுவும் ஆங்கிலப்படங்களின் வருவது போல உலகம் அழியப்போகிறது… எம்மை நோக்கி பெரிய ஆபத்து வருகிறது என்று கிளப்பிவிட ஒரு கும்பல் எப்போதும் டிசம்பர் மாதத்திற்காக காத்திருப்பதை நீங்களும் ஒரு நாள் உணர்ந்திருப்பீர்கள். ஒரு தடவையே சுனாமி எம்மைத் தாக்கியது ஆனால் ஓராயிரம் தடவைகள் எம்மை ஓட விட்ட கும்பலும் இதுவன்றோ.
இந்த வகையில் இம்முறையும் அந்த கும்பல் மக்களிடையே பீதியை கிளப்ப மறக்கவில்லை. வரும் டிசம்பர் மாதத்தில் சூரியன் 3 நாட்களுக்கு மேல் உதிக்காமல் பின்னர் மேற்கிலிருந்து உதிக்க ஆரம்பிக்கும். இது உலக அழிவின் ஆரம்பம், டிசம்பர் 21ஆம் திகதியுடன் மாயன் நாட்காட்டி முடிவுக்கு வருகின்ற அன்றைய தினம் நிபிறு பிரளயம் ஏற்பட்டு உலகம் அழியப்போகின்றது என பல கதைகளை கட்டவிழ்த்து விட்டுள்ளார்கள்.


ஆனாலும் 2003ஆம் ஆண்டிலிருந்தே 2012ஆம் குறிவைத்து ஏராளமான தகவல்கள், பூமியில் பாரிய அழிவுகள் உண்டு என்பதை உரைத்து வருகின்றது. அவை அனைத்தும் மத நம்பிக்கைகளுடன் தொடர்புபட்ட அதேவேளை விஞ்ஞானத்துடனும் ஒத்துப்போவதனால் இவை எதனையும் அத்தனை இலகுவில் இம்முறை வதந்திகள் என்ற பார்வையில் சிந்திக்க முடியவில்லை என்பதே உண்மை.
உண்மை உணர்ந்துகொள்ள நீண்ட நாட்கள் இல்லை. டிசம்பர் 21 எம்மை நெருங்கிக்கொண்டே இருக்கிறது. அதுவரை தேவையற்ற வதந்திகளினால் மக்களை பீதி ஏற்படுத்துவதை குறைத்து வீணாக உயிர்கள் பலியாவதை தவிர்ப்பதே சாலச் சிறப்பு. மேலும் நடப்பவை நன்றாகவே நடக்கும் என்று நம்புவோம்



7 Responses to “”

  • பலெர்மோ .தமிழ் கிறுக்கன்:

    உலகம் அழியும் என்று எத்தனை தடவை மக்களே எமத்துவர்கள் ? உலகம் அழியப்போகின்றது என கடந்த நூற்றாண்டுகாலங்கள் மக்களின் வயிற்றில் புளியைக்கரைத்துகொன்டுதான் இருக்கிறார்கள் நீங்கள் அறிந்திருக்கின்றீர்களா?

  • manitan:

    மேலே இருப்பதை வாசித்துபார்தால் கிறிஸ்த்தவர்கள் எதிர்பாப்பதுபோல இயேசுவின்ர இரகசிய வருகை இருக்குமோ ,நம்பமுடியாமலும் இருக்குது அனால் பயமாயும் இருஃகுஉ.

  • உலக அழிவு சம்மந்தமாக மிகவும் சிறப்பான முறையில் பல ஆதாரங்களை திரட்டி பலதகவல்களை
    எழுதியுள்ளீர்கள். நன்றிகள்!!!

    21/12/2012 உலக அழிவு சம்பந்தமாக பலர் பல விதமான கருத்துக்களை எழுதியும் சொல்லியும்
    மக்களை பயமுறுத்தியும் வருகிறார்க‌ள். நான் அறிந்த வரையில் இது எல்லாம் கட்டுக்கதை!!
    முற்றிலும்பொய்!!!
    ஏனென்றால் மாயன் கலண்டர் 21/12/2012 முடிவடைகிறது.என்று மாயன் கலண்டரை
    சிலர் காரணம் காட்டுகிறார்கள். ஆனால் உண்மை என்னவெனில் மாயன் கலண்டர் ஒருபோதும் முடிவ‌தில்லை
    இவர்கள் மாயன் கலண்டர் முடிவு என்று குறிப்பிடுவது பல தடவைகள் இடம்பெற்றுள்ளது. எனிவரும் தொடர்ச்சி
    பதின்மூன்றாம் தடவை ஆகும்.
    பன்னிரண்டு தடவைகள் தொடர்ந்து மாயன் கலண்டர் எண்கள் கூடிக்கொண்டே போனது அதாவது
    இரண்டாயிரம் ஆண்டு உலகம் அழியப்போகுது என்றுசொன்னவர்கள்.பின்பு 2001,2002 என்று தொடர்ந்து
    போனதுபோல மாயன் கலண்டர் எண் தொடர்ந்து கொண்டே இருக்கும்-

    பைபிளிலும் அழிவு சம்பந்தமாக இங்குள்ள வீடியோக்கிளிப்பில் குறிப்பிடுவதுபோல
    வெளிப்படுத்தல் அதிகாரம் 6 இல் 12, 13, 14 வசனங்களை குறிப்பிட்டு சொல்கிறார்.
    அதாவது பூமிகம்பளியைப்போல் கருத்தது, சந்திரன் இரத்தம் போல் சிவந்தது.
    மரத்தில் இருந்து காய்கள் விழுவதுபோல் வானத்தில் இருந்து நட்சத்திரங்கள் பூமியிலே
    விழுந்தது. வானம் சுருட்டபட்ட புத்தகத்தினைப்போல விலகிப்போனது.மலைகள் தீவுகள்
    தங்கள் இடங்களை விட்டு விலகிப்போயின!! !!
    சரி இது எல்லாம் எப்ப நடக்கும் என்று பைபிளில் ஆண்டோ திகதியோ எங்கயாவது குறிப்பிடப்பட்டு உள்ளதா??
    இல்லையே!!!பைபிளில் ஒரிடத்திலும் குறிப்பிடப்பட‌ வில்லை . ஆண்டு திகதி குறிப்பிடப்பட்டு இல்லை . ஆனால் மனிதர்
    தான் தாங்களாக திகதி மாதம் ஆண்டு சொல்கிறார்கள்.
    உண்மையிலை முக்கியமான விடயம் என்னவென்றால் பைபிளில் மத்தேயு 24 அதிகாரத்தில் 36 வசனத்தில் அந்தநாளும் அந்த நேரமும் பரலோக தகப்பன் தவிர வேறு யாருக்கும் தெரியாதுதேவதூதர்களுக்கும் தெரியாது. என் மகனாகிய யேசுகிறிஷ்துவுக்கும் தெரியாது. இப்படியாக இருக்கும் போது எப்படி சாதாரண மனிதர்கள் திகதி மாதம் எப்படி அறிந்து 21/12/2012 என்று சொல்லமுடியும் .
    மேலும் பைபிளை நன்றாக படித்தவர்கள் யாரும் மக்களுக்கு விளக்கம் தருவீர்களா?உலகம் உண்மையாக அழியுமா ?மனிதர்களால் உலக அழிவின் திகதி மாதம் ஆண்டினை கணிக்கமுடியும் என்று பைபிளில் எங்காவது இருக்கிறதா?? பைபிளில்இருந்தால் குறிப்பிடுங்கள்-உலக அழிவு சம்பந்தமாக வேறுமதங்களின் கருத்து என்ன??
    உலகத்தை உருவாக்கியது கடவுள்என்றால் கடவுள் உலகை ஏன் அழிய விடுவார்??ஆனால் என்றோ ஒருநாள் உலகத்தில் உள்ள ஒருபகுதி உயிரினங்கள் அழியலாம் .அதுதான் பைபிளிலும் குறிப்பிட்டப்பட்டு இருக்கிறது,
    அது இப்போதும் சில சில இடங்களில் இடம் பெற்றுக்கொண்டே தான் இருக்கிறது-எனவே உலகம் முற்றிலும் அழிவது என்பது எல்லாம் பொய் , மக்கள் பயம் கொள்ளத்தேவையில்லை எதற்க்கும் எது உண்மை!!
    பொய் !!என்றுபொறுத்து இருந்து பார்ப்போம்.

  • nanpan:

    ஆசாமிகள் பிளைப்பிற்காகவும் தங்களை விளம்பரப்படுத்தவும் குறிப்பாக மக்களைஏமாற்ரவும் இப்படிபுரளியை கிளப்புகிறாங்க முன் இப்படியே 2000மாமாண்டு உலகம் அழியுமெண்டாங்க இப்போ2012 இதெல்லாம் புஷ்ஷ்ஷ்ஷ் வாணம்

  • எனக்கு ஒரே ஒரு ஆசைதான்.அதுமட்டும் நிறைவேறினால் போதும்.இந்த உலக அழிவில் என்னோடு என்மனைவி இறக்கக்கூடாது.இதுதான் என் ஆசை. அங்கேயாவது கொஞ்சம் தலையிடியில்லாமல் இருக்கலாம் என்ற நற்பாசைதான்.
    கலட்டி சுள்ளான்.

  • ராசன்:

    உலகம் ஏற்கனவே அழிந்து கொண்டுதான் இருக்கின்றன அதில் எந்தவித சந்தேகமுமில்லை .அதற்காக நான் ஒருத்தரையும் வித்துத்தின்னச்சொல்லிச் சொல்லேலை அல்லது வட்டிக்கெடுத்தும் தின்னச்சொல்லேலை! வெக்கத்தை விட்டுச்சொல்லுகிறன் ஊரிலை நாங்கள் ஒரு சில வீடுகளுக்கு போனால் படியில கால்வைக்க நடுங்கும். இங்கு (புலத்தில்) அவர்களின் பிள்ளைகள் நன்றாக உழைக்கிறார்கள் ஆனால் மற்ரவர்கள் பகிடிபண்ணாதளவுக்கு வாழத்தெரியவில்லை இதற்கு காரணம் ? தெரிந்தவர்களிடம் பதிலை எதிர்பாக்கிறேன்.முற்பிறவியில் செய்த பாவமென்றம் சொல்லேலாதது விதியை மதியால் வெல்லலாமென்றும் சொல்கிறார்கள்.ஒருசாண் வயிற்றுக்காக இப்படியெலலாம் பாடுபட வேண்டியிருக்குதன்று முன்ணோர்கள் முணுமுணுப்பார்கள் அப்படிச்சொல்வதும் சரியாக இருக்காது.21.12.சிலவேளை உலகம் அழிந்தால் இவர்களை எமன் ஒராழுக்கு 25,30 கிலோ கொண்டு போகலாமென்று சொல்லுகிறாரோ தெரியவில்லை?

  • புத்திசாலி:

    நான் உங்களைப்போல் உள்ளவர்களிடம் ஐந்து பத்து கைமாத்தாய் வேண்டிப்போட்டு ஐனவரி முதலாம் திகதி தரலாம் என யோசிக்கிறேன் இதைப்பற்றி நிங்கள் என்ன நினைக்கிறிர்கள், புத்திசாலி

Leave a Reply

திருமண சேவை

விளம்பரங்கள்




 

பிறந்தநாள் வாழ்த்து